Üç lider İlham Əliyev, Nikol Paşinyan, Donald Tramp Cənubi Qafqazda sülhü mümkün etdi.

"NAXÇIVANXƏBƏRLƏRİ"-nin məlumatına görə, ABŞ-nin vitse-prezidenti Cey Di Vens bunu Bakıda Azərbaycan Prezidenti İlham Əliyevlə birgə bəyanatla çıxış edərkən bildirib.

"Bu üç lider uzun illər davam edən müharibəyə son qoydu. Nəhayət, regionda sülh hökm sürür. Tramp administrasiyasının məqsədi sülhün bərqərar edilməsidir", - C.Vens deyib.

"Faktiki olaraq, üç nəfər tarixi sülh yaratdı - Azərbaycan Prezidenti, Ermənistanın Baş naziri və əlbəttə ki, Amerika Birləşmiş Ştatlarının Prezidenti. Onlar birgə səylərlə əvvəllər müharibənin olduğu yerdə sülh yaratdılar. Bu, həm ABŞ Prezidentinin, həm də Prezident Əliyevin liderliğinin möhtəşəm sübutudur", - o qeyd edib.

Vensin sözlərinə görə, Tramp xarici siyasətdə belə bir yanaşma irəli sürdü: əgər bir-birinizlə ticarətlə məşğul olmaq, tərəfdaşlıqlar qurmaq və əməkdaşlıq etmək mümkündürsə, müharibə etmək nəyə lazımdır?".

"Əminəm ki, ABŞ və Azərbaycan arasında tərəfdaşlıq regionda daha böyük sülhə və firavanlığa gətirib çıxaracaq, amerikalı işçilər üçün yeni bazarlara çıxış imkanı yaradacaq və ölkələrin müharibə etmək əvəzinə əməkdaşlıq etdiyi daha təhlükəsiz və firavan dünya yaratmağa kömək edəcək", - o əlavə edib.