2026-cı ildə ali təhsil müəssisələrinin magistraturalarına qəbul imtahanlarında iştirak edən bakalavrların sayı ötən illə müqayisədə artıb, lakin imtahan nəticələrinin əsas göstəricilərində geriləmə qeydə alınıb.

"NAXÇIVANXƏBƏRLƏRİ" məlumat verir ki, Dövlət İmtahan Mərkəzinin rəsmi saytında yer alan məlumata görə, bu il keçirilən imtahanlarda ümumilikdə 27 859 bakalavr iştirak edib. 2025-ci ildə isə bu göstərici 26 241 nəfər olub. Beləliklə, iştirakçıların sayı bir il ərzində 1 618 nəfər və ya təxminən 6,2 faiz artıb.

Bununla yanaşı, 2026-cı ildə imtahan iştirakçılarının orta balı 45,90 olub. Ötən il bu göstərici 48,26 bal təşkil edib. Bu isə orta nəticənin 2,36 bal və ya təxminən 4,9 faiz azalması deməkdir.

Yüksək nəticə göstərənlərin sayında da azalma müşahidə olunub. Belə ki, bu il 90-95 arası bal toplayanların sayı 21 nəfər, 2025-ci ildə isə 27 nəfər olub. 85-90 arası bal toplayanların sayı isə bu il 68, ötən il 94 nəfər olub.

Balların paylanmasına nəzər saldıqda isə 2026-cı ildə ən çox iştirakçının 40–45 bal intervalında olduğu görünür – 3 867 nəfər.

2025-ci ildə də ən yüksək göstərici bu intervalda qeydə alınıb və 3 168 nəfər təşkil edib. Eyni zamanda, 2026-cı ildə 0–30 bal toplayanların sayı 3 684 nəfərə yüksəlib. Ötən il bu göstərici 3 147 nəfər olub.

Ümumilikdə, statistik müqayisə göstərir ki, 2026-cı ildə magistratura imtahanlarına maraq artaraq iştirakçıların sayı yüksəlsə də, həm orta bal, həm də yüksək nəticə göstərən bakalavrların sayı 2025-ci illə müqayisədə azalıb.