Ötən ay hərbi sahədə qeydə alınan vəzifə səlahiyyətlərindən sui-istifadə və ya vəzifə səlahiyyətlərini aşma cinayətləri azalıb.

"NAXÇIVANXƏBƏRLƏRİ"-nin məlumatına görə, bunu hərbi prokurorun böyük köməkçisi - Hərbi Prokurorluğun Mətbuat xidmətinin rəhbəri, baş ədliyyə müşaviri Firad Əliyev mətbuata açıqlamasında deyib.

O bildirib ki, 2025-ci ilin yanvar ayında Hərbi Prokurorluqda qeydə alınmış cinayətlər 100 faizi açılıb:

"Hərbi Prokurorluq orqanları ilə Müdafiə Nazirliyi, Dövlət Sərhəd Xidməti, Daxili Qoşunlar və digər hərbi qurumlar arasında yaranmış qarşılıqlı sağlam və işgüzar əlaqələrin, həmçinin, birgə səmərəli fəaliyyətin, o cümlədən görülmüş qabaqlayıcı tədbirlərin nəticəsində 2025-ci ilin yanvar ayında Azərbaycan Silahlı Qüvvələrində Əmri icra etməmə, Fərarilik, Silahla və ətrafdakılar üçün yüksək təhlükə törədən əşyalarla davranış qaydalarını pozma, Maşınları idarəetmə və istismar qaydalarını pozma , Qəsdən sağlamlığa ağır zərər vurma və Qəsdən adam öldürmə cinayətləri qeydə alınmayıb".

Firad Əliyevin sözlərinə görə, görülən qabaqlayıcı tədbirlərin nəticəsində Silahlı Qüvvələrdə 2024-cü ilin eyni ayı ilə müqayisədə, 2025-ci ilin yanvar ayında qeydə alınmış vəzifə səlahiyyətlərindən sui-istifadə və ya vəzifə səlahiyyətlərini aşma cinayətləri 77,8%, rüşvət alma və rüşvət vermə cinayətləri isə 31,6% azalıb.