Azərbaycanda fəaliyyət göstərən turagent və turoperatorların sayı ötən il rekord həddə yüksəlib.

"NAXÇIVANXƏBƏRLƏRİ" məlumat verir ki, bu barədə Dövlət Statistika Komitəsinin "Azərbaycanda turizm – 2026" statistik məcmuəsində məlumat verilib.

Məlumata görə, 2025-ci ildə ölkədə fəaliyyət göstərən turagent və turoperatorların sayı 434 olub. Bu göstərici 2024-cü ildə 381, 2023-cü ildə 300, 2022-ci ildə 240, 2021-ci ildə isə 150 təşkil edib. Beləliklə, son beş ildə turizm şirkətlərinin sayı təxminən 2,9 dəfə artıb.

Statistikaya əsasən, ötən il fəaliyyət göstərən bütün turagent və turoperatorlar qeyri-dövlət sektoruna məxsus olub. Onlardan 407-si özəl, 17-si xarici, 10-u isə birgə müəssisə kimi fəaliyyət göstərib.

Hesabatda qeyd olunur ki, turizm sektorunda məşğulluq da artıb. Belə ki, 2025-ci ildə turagent və turoperatorlarda çalışan işçilərin sayı 2 min 687 nəfərə çatıb. Bu göstərici 2021-ci ildə 962 nəfər idi.