Naxçıvan Muxtar Respublikasının İqtisadiyyat Nazirliyi yanında Əmlak Məsələləri Dövlət Xidmətinin tabeliyində “Hərracların Təşkili Mərkəzi” publik hüquqi şəxs tərəfindən muxtar respublikanın 5 bələdiyyəsinə məxsus torpaq sahələrinin mülkiyyətə və icarəyə verilməsi ilə bağlı hərrac keçirilib.

"NAXÇIVANXƏBƏRLƏRİ" məlumat verir ki, rəqabətli keçən hərrac prosesində qeydiyyatdan keçən 12 sifarişçi iştirak edib. Nəticədə hərraca çıxarılan 6 torpaq sahəsindən 3 torpaq sahəsi mülkiyyətə, 3 torpaq sahəsi isə icarəyə verilib. 5 sahibkar hərracın qalibi olub.

Qeyd edək ki, mərkəz tərəfindən 16 və 26 dekabrda nəqliyyat vasitələrinin, 17 dekabrda qeyri-yaşayış sahələrinin özəlləşdirilməsi hərracları, 22 dekabrda isə Naxçıvan şəhərindəki torpaq sahəsinin mülkiyyətə verilməsi üzrə müsabiqə keçiriləcək.

Hərrac və müsabiqələrlə bağlı ətraflı məlumatı Əmlak Məsələləri Dövlət Xidmətinin (http://nemlak.gov.az/az/)  və “Hərracların Təşkili Mərkəzi” publik hüquqi şəxsin (http://nauksion.gov.az) rəsmi saytlarından əldə etmək olar.