Sentyabrın 15-də Xankəndi şəhərindəki, Xocalı və Ağdərə rayonlarındakı ümumi təhsil məktəblərində yeni tədris ilinin başlanması ilə əlaqədar tədbirlər keçirilib.

"NAXÇIVANXƏBƏRLƏRİ" məlumat verir ki, tədbirlərdə Qarabağ bölgəsində təhsilin inkişafına göstərilən dövlət qayğısından danışılıb, müəllim və şagirdlərə yeni dərs ilində uğurlar arzulanıb.

Bu gün Xankəndi şəhəri Nizami Gəncəvi adına 4 nömrəli məktəbdə 110, Kərkicahan qəsəbə 1 nömrəli məktəbdə 14, Xocalı şəhər 1 nömrəli tam orta məktəbdə 11, Ballıca kənd tam orta məktəbdə 11, Ağdərə rayonunun Suqovuşan kənd tam orta məktəbdə 14, Vəngli kənd tam orta məktəbdə 4, Həsənriz kənd tam orta məktəbdə 15 şagird birinci sinfə qədəm qoyub. Bu məktəblərdə ümumilikdə 2154 şagird təhsil alacaq.