“Azərbaycanın dövlət müstəqilliyi dönməzdir, yenilməzdir, sarsılmazdır. Biz Azərbaycanın dövlət müstəqilliyini bundan sonra da göz bəbəyimiz kimi qoruyacağıq, yüksəldəcəyik". 

Ulu Öndər Heydər Əliyev

3 oktyabr 1993-cü il Azərbaycan tarixinin mühüm siyasi hadisələrindən biri kimi yadda qalmışdır. Həmin gün xalqın iradəsi ilə Heydər Əliyev Azərbaycan Respublikasının Prezidenti seçilmişdir. Bu tarixi hadisə müstəqil dövlətçiliyin möhkəmləndirilməsi, ölkədə sabitliyin təmin olunması və Azərbaycanın gələcək inkişaf istiqamətlərinin müəyyənləşdirilməsi baxımından əlamətdar mərhələ olmuşdur.

1990-cı illərin əvvəllərində Azərbaycan mürəkkəb ictimai-siyasi, iqtisadi və sosial proseslərlə üz-üzə idi. Belə bir şəraitdə dövlət idarəçiliyinin möhkəmləndirilməsi, milli maraqların qorunması, ölkənin ərazi bütövlüyü və müstəqilliyinin təmin olunması qarşıda duran əsas vəzifələr sırasında idi.

Heydər Əliyevin siyasi hakimiyyətə qayıdışı ilə Azərbaycanda dövlət idarəçiliyinə yeni yanaşma formalaşdı. Dövlətçilik ənənələrinin möhkəmləndirilməsi, hüquqi və institusional əsasların inkişaf etdirilməsi, ölkənin beynəlxalq mövqelərinin gücləndirilməsi istiqamətində mühüm addımlar atıldı.

Ulu Öndərin rəhbərliyi ilə həyata keçirilən siyasətdə Azərbaycanın milli maraqları, dövlət müstəqilliyinin qorunması və ölkənin gələcək inkişafı əsas prioritetlərdən biri kimi müəyyənləşdirildi. Eyni zamanda, iqtisadi inkişafın təmin edilməsi, xarici investisiyaların cəlb olunması və Azərbaycanın beynəlxalq iqtisadi əlaqələrinin genişləndirilməsi istiqamətində mühüm layihələr həyata keçirildi.

3 Oktyabr yalnız prezident seçkisinin keçirildiyi tarix deyil, həm də Azərbaycanın müstəqil dövlətçilik tarixində mühüm mərhələnin başlanğıcı kimi səciyyələnir. Həmin dövrdə qəbul edilən qərarlar və həyata keçirilən dövlətçilik siyasəti sonrakı illərdə ölkənin siyasi, iqtisadi və institusional inkişafına təsir göstərən əsas amillərdən olmuşdur.

Bu gün 3 Oktyabr tarixinə nəzər salarkən Ulu Öndər Heydər Əliyevin Azərbaycan dövlətçiliyinin möhkəmləndirilməsi istiqamətində həyata keçirdiyi siyasətin tarixi əhəmiyyəti xüsusi qeyd olunur. Onun zəngin dövlətçilik irsi Azərbaycanın müasir tarixində mühüm yer tutur.

3 Oktyabr Azərbaycan xalqının dövlətçilik tarixində xüsusi əhəmiyyət daşıyan, yaddaşlarda yaşayan əlamətdar tarixdir. Bu tarix həm də müstəqilliyin qorunmasının, dövlətçilik ənənələrinin yaşadılmasının və gələcəyə inamın ifadəsi kimi dəyərləndirilir.

Sözlərimi Ulu Öndər Heydər Əliyevin fikirləri ilə tamamlamaq istəyirəm:

“İndi dünyada müstəqil Azərbaycan dövləti var. Onun milli dövlət bayrağı var, milli himni var, milli gerbi var. Azərbaycan dünya birliyində özünə layiq yer tutubdur. Azərbaycanın dövlət bayrağı bütün beynəlxalq təşkilatların iqamətgahları qarşısında dalğalanır, müstəqil Azərbaycanın başı üstündə dalğalanır və daim dalğalanacaqdır, bu yüksəkliklərə qalxmış bayraq bundan sonra heç vaxt enməyəcəkdir". 

Azərbaycanın müstəqilliyi əbədidir!

Nicat Allahverdiyev

İdman mütəxəssisi