2026-cı ilin hazırlıq planına əsasən, Heydər Əliyev adına Hərbi İnstitutda keçirilən cüdo, yunan-Roma və sərbəst güləş üzrə ordu birinciliyi başa çatıb. 

Bu barədə "NAXÇIVANXƏBƏRLƏRİ"-nə Müdafiə Nazirliyindən məlumat verilib.

Bağlanış mərasimində Azərbaycan xalqının Ümummilli Lideri Heydər Əliyevin və Vətən uğrunda canından keçən şəhidlərimizin xatirəsi bir dəqiqəlik sükutla yad edilib. Hərbi orkestrin müşayiəti ilə Azərbaycan Respublikasının Dövlət Himni ifa olunub.

Tədbirdə çıxış edənlər bu cür yarışların Azərbaycan Ordusunun şəxsi heyətinin fiziki hazırlığının yüksək səviyyədə saxlanılmasında əhəmiyyətini xüsusi vurğulayıb, qalib komandaları təbrik edərək onlara gələcək fəaliyyətlərində uğurlar arzulayıblar. Bildirilib ki, birincilikdə cüdo, yunan-Roma və sərbəst güləş üzrə 10 çəki dərəcəsində 11 komandadan ümumilikdə 297 idmançı mübarizə aparıb.

Yarışların hakimləri tərəfindən topladıqları xallara uyğun olaraq fərdi və komandalar üzrə qaliblər elan edilib.

Sonra qalib komandalara kubok, fərdi nəticələrə görə isə hərbi qulluqçulara fəxri fərman, medallar və diplomlar təqdim olunub.