Sual: Şəxsi məlumatları hansı hallarda toplamaq və işlətmək olar?

Cavab: Şəxsi məlumatların toplanması və işlənməsi "Fərdi məlumatlar haqqında" Azərbaycan Respublikasının Qanunu ilə tənzimlənir. Bu qanuna əsasən, şəxsi məlumatların toplanması və işlənməsi aşağıdakı hallarda qanuni hesab olunur:

1.Məlumat subyektinin razılığı ilə: Şəxsi məlumatların toplanması və işlənməsi, məlumat sahibinin (subyektinin) yazılı razılığı əsasında aparılır.

2.Qanunvericiliklə nəzərdə tutulmuş hallarda: Əgər qanunvericilikdə xüsusi hallar müəyyən edilibsə, şəxsi məlumatlar məlumat subyektinin razılığı olmadan da toplanıb işlənə bilər. Məsələn, dövlət təhlükəsizliyi, cinayətkarlıqla mübarizə və ya ictimai asayişin təmin edilməsi məqsədilə.

3.Məlumat subyektinin həyati maraqlarının qorunması üçün: Məlumat subyektinin həyatı, sağlamlığı və ya digər həyati vacib maraqlarının qorunması üçün şəxsi məlumatların toplanması və işlənməsi zəruridirsə.

4.Məhkəmə aktlarına və ya hüquq-mühafizə orqanlarının qərarlarına əsasən: Məhkəmə qərarları və ya hüquq-mühafizə orqanlarının qanuni tələbləri əsasında şəxsi məlumatlar toplanıb işlənə bilər.

Həmçinin qeyd etmək lazımdır ki,şəxsi məlumatların toplanması və işlənməsi zamanı məlumat subyektinin hüquqları qorunmalı və məlumatların məxfiliyi təmin edilməlidir.

Sualı cavablandırdı: Babək rayon prokurorunun böyük köməkçisi kiçik ədliyyə müşaviri - Camal Sadiqov