İyunun 24-də Naxçıvan Dövlət Universitetinin (NDU) təşkilatçılığı ilə Saat Meydanı İstirahət Mərkəzində ali təhsil ocağının tarixində sayca 55-ci “Məzun Günü” keçirilib.

"NAXÇIVANXƏBƏRLƏRİ" məlumat verir ki, öncə Ümummilli Lider Heydər Əliyevin və şəhidlərimizin əziz xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib.

Tədbirdə üniversitetin rəhbər və akademik heyəti, fəxri məzunlar, ziyalılar, ictimai şəxslər, tələbələr və valideynlər olmaqla dörd mindən artıq şəxs iştirak ediblər.

Tədbir tanınmış teleaparıcı Abbasağa Əlizadənin təqdimatında “Bizik sabahın səsi” adlı musiqi nömrəsi sədasında universitetin Tanıtım videoçarxının nümayişi ilə başlayıb. Sonra musiqi sədaları altında təntənəli məzun keçidi ilə davam edib.

Tədbirdə çıxış edən Naxçıvan Dövlət Universitetinin rektoru Elbrus İsayev əsası Ümummilli Lider Heydər Əliyev tərəfindən qoyulmuş, Prezident İlham Əliyev tərəfindən qətiyyətlə davam etdirilən dövlət gənclər siyasətindən bəhs edib, sabahımız olan gənclərin  əsas prioritetlərdən biri olaraq xüsusi diqqət mərkəzində saxlanıldığını vurğulayıb. Məzunları təbrik edən rektor Elbrus İsayev deyib:  “Yarım əsr yaşı olan Naxçıvan Dövlət Universiteti zəngin inkişaf yolu keçib. 1967-ci  ildə cəmi 3 ştatda olan müəllim, 3 ixtisas, 102 tələbə ilə fəaliyyətə başlayıb. Bu gün isə ölkədə yeganə kampuslu universitet olub 108 hektarlıq ərazidə 10 fakültə, 45 kafedra, 524 nəfərlik professor-müəllim heyəti,12 minə yaxın tələbə kontingenti ilə fəaliyyət göstərir. NDU nəzdində 3 kollec, 1 Beynəlxalq Kembric Məktəbi və 1 İngilis dili Təmayüllü Gimnaziya, 2 tədqiqat institutu, 1 rəsədxana var. Müasir tipli və çoxprofilli təhsil sisteminə malik ali təhsil müəssisəsi kimi Muxtar Respublikada yeganə universitet olaraq 4 istiqamətdə 250-ə yaxın proqram üzrə yüksək ixtisaslı mütəxəssislər hazırlayır. Universitetin inkişaf strategiyasında elmin inkişafını dəstəkləyən hədəflər müəyyənləşdirilib, azərbaycan dili ilə yanaşı tədrisi ingilis dilində olan ixtisaslar açılıb, beynəlxalq əməkdaşlıqlar gücləndirilib”.

Rektor Elbrus İsayev qeyd edib ki, Azərbaycan Respublikası Prezidentinin “Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramı”ndan irəli gələn və xarici ölkələrin ali təhsil müəssisələri arasında əməkdaşlığın gücləndirilməsi, birgə proqramların təşkili yönündə NDU-nun icra olunan fəaliyyətləri çərçivəsində ikili diplom layihələri icra edilir, tədrisə, tədqiqata cəlb edilən əcnəbi professor sayı davamlı artır  və birgə elmi tədqiqatlar həyata keçirilir. Universitetdə tələbəyönümlü təhsil sistemi tətbiq edilir, dünyanın 150-yə yaxın universiteti ilə birbaşa əlaqələr qurulur, 15 ölkədən 2000-ə yaxın əcnəbi tələbə ilə ölkə universitetləri arasında  ön sırada qərarlaşır.

Naxçıvan Dövlət Universitetinin tələbələrinin təhsil göstəriciləri ilə yanaşı, elmi fəaliyyətləri, startap təşəbbüsləri, könüllülük və ictimai fəallıqları ilə də fərqləndiyini qeyd edən rektor, onların beynəlxalq konfranslarda, tələbə təşkilatlarında, sosial layihələrdə qazandıqları uğurlardan söz açıb. Elbrus İsayev qeyd edib ki, 2025-ci il NDU nəzdində olan təhsil müəssisələri ilə birgə ümumilikdə 2313 nəfər məzun təhsilini uğurla başa vurur.  Ötən illə müqayisədə 5% artım olub və NDU tarixində təhsil ocağının ən çox məzun verdiyi il olaraq tarixə düşür. Eyni zamanda son 5 ilin göstəricilərinin təhlilinə əsasən universitet məzunlarının 73%-i əmək bazarında ixtisaslarına uyğun vəzifələrdə çalışırlar. Tələbələrin qazandığı uğurların universitetin inkişaf strategiyasının ən böyük göstəricisi olduğunu qeyd edən rektor məzunlara yüksək ixtisaslı mütəxəssislər, ölkəmizin böyük ümidlər bəslədiyi gənclər, layiqli vətəndaşlar olmağı arzu edib.

Ardınca NDU nəzdindəki Musiqi Kollecinin təqdimatında “Atəşgah” adlı rəqs nömrəsi nümayiş olunub.

NDU-nun  “ALABANDA” rock qrupunun ifası səsləndikdən sonra, təhsil müddətində ümumi orta müvəffəqiyyət göstəricisi (ÜOMG) yüksək olan və xüsusi fəallığı ilə seçilən  məzunlara sertifikat və hədiyyələr təqdim edilib, “Məzun kötüyünə” xatirə lövhəsi vurulub.

Tədbirdə Bakıdan dəvət olunmuş “Mardan”  qrupunun ifasında rəngarəng musiqi nömrələri dinlənilib.

 Sonda məzunların papaqatma mərasimi və möhtəşəm atəşfəşanlıq baş tutub. “Məzun günü” münasibəti ilə yaddaqalan tədbir proqramı təqdim olunub.