Azərbaycan 17–28 noyabr 2025-ci il tarixlərində Bakıda Ümumdünya Telekommunikasiyanın İnkişafı Konfransına (WTDC-25) ev sahibliyi edəcək. Azərbaycan Respublikasının Rəqəmsal İnkişaf və Nəqliyyat Nazirliyinin təşkilatçılığı ilə Keçiriləcək bu tədbirdə dünyanın hər yerindən dövlət və hökumət başçıları, nazirlər, beynəlxalq təşkilat rəhbərləri, sənaye liderləri və ekspertlər də daxil olmaqla 1500-dən çox iştirakçı qatılacaqdır. Bu mötəbər tədbir, qlobal rəqəmsal inkişaf gündəminin formalaşdırıldığı ən vacib platformalardan biri olacaq.

Naxçıvan Muxtar Respublikası Rəqəmsal İnkişaf və Nəqliyyat Nazirliyinin mətbuat xidmətindən "NAXÇIVANXƏBƏRLƏRİ"-nə verilən məlumata əsasən, WTDC-nin əsas məqsədi, bu gün hələ də internet bağlantısından məhrum olan təxminən 2,6 milyard insana sərfəli, mənalı və davamlı əlaqə təmin etməkdir.

Dörd ildən bir keçirilən WTDC, növbəti dörd il üçün Telekommunikasiyanın İnkişafı Sektorunun (ITU-D) prioritetlərini və strategiyalarını müəyyən etmək üçün Beynəlxalq Telekommunikasiya İttifaqına (BTİ) üzvlük üçün mühüm platforma yaradır. Tədbir zamanı yeni Regional Təşəbbüslər elan ediləcək, ITU-D Tədqiqat Qrupu mövzuları müzakirə olunacaq, mövcud qətnamələr yenilənəcək və yeni sənədlər qəbul ediləcək..

Naxçıvan Muxtar Respublikasının Rəqəmsal İnkişaf və Nəqliyyat Nazirliyinin təklifi ilə konfrans iştirakçılarına Azərbaycanın zəngin mədəni irsini və təbiətini tanıtmaq məqsədilə Naxçıvan Muxtar Respublikasına xüsusi tur təklif edilir (https:// wtdc2025.az/plan-your-travel/discover-baku). Səfər qonaqlara muxtar respublikanın unikal tarixi, memarlıq inciləri və qonaqpərvərliyi ilə yaxından tanış olmaq imkanı verəcək. Tur proqramına Gülüstan və Möminə Xatun məqbərələrinin ziyarəti, şəfalı Duzdağ mədənində istirahət, eləcə də əfsanəvi Nuhun məqbərəsinə səfər daxildir. Bir günlük bu unudulmaz səyahət Naxçıvanın qədim ruhunu kəşf etmək üçün nadir fürsət olacaq.