Cəlil Məmmədquluzadə adına Naxçıvan Dövlət Milli Dram Teatrında 144-cü teatr mövsümünə hazırlıq işləri yekunlaşmaq üzrədir. 1883-cü ildən fəaliyyət göstərən sənət ocağı yeni mövsümdə premyeralar, beynəlxalq layihələr və yeni əməkdaşlıqlarla tamaşaçıların görüşünə gələcək.

"NAXÇIVANXƏBƏRLƏRİ" məlumat verir ki, mövsümün açılış mərasimində Naxçıvan Dövlət Milli Dram Teatrı ilə Azərbaycan Dövlət Akademik Milli Dram Teatrı arasında rəsmi əməkdaşlıq sazişi imzalanacaq. Saziş iki teatr arasında təcrübə mübadiləsi, birgə layihələr və qastrol səfərlərinin həyata keçirilməsinə imkan yaradacaq.

Açılış günündə teatrın kollektivi Əbdürrəhim bəy Haqverdiyevin "Pəri cadu" əsərini səhnəyə qoyacaq.

Əməkdaşlıq çərçivəsində Naxçıvan teatrının Bakıya qastrol səfəri də planlaşdırılır. Hüseyn Cavidin anadan olmasının 144-cü ildönümü münasibətilə teatr paytaxtda dramaturqun "Ana" dramını nümayiş etdirəcək.

Repertuarda dünya klassikasına da yer ayrılıb. İlin sonunadək Sofoklun "Tiran Edip" faciəsinin tamaşaya hazırlanması nəzərdə tutulur. Bununla yanaşı, teatrın mövsüm ərzində bir sıra beynəlxalq teatr festivallarında iştirakı da planlaşdırılır.

Teatrdan bildirilib ki, fəaliyyət "Azərbaycan Mədəniyyəti – 2040 Konsepsiyası"na uyğun qurulur. Bu istiqamətdə teatr idarəçiliyində rəqəmsallaşma, gənc rejissor və aktyorların dəstəklənməsi, eləcə də inklüzivliyin artırılması sahəsində işlər davam etdirilir. 144 illik tarixə malik sənət ocağı yeni mövsümdə də zəngin ənənələrini müasir teatr yanaşmaları ilə birləşdirməyi hədəfləyir.