Sual: İşə qəbul zamanı sınaq müddəti maksimum nə qədər ola bilər və bu müddət kimlərə tətbiq edilmir?

Cavab: Azərbaycan Respublikası Əmək Məcəlləsinin 51-ci və 52-ci maddələrinə əsasən, işə qəbul edilərkən işçinin peşəkarlığını və iş bacarığını yoxlamaq üçün maksimum 3 aylıq sınaq müddəti təyin edilə bilər. Lakin qanunvericilik bəzi şəxslər üçün sınaq müddətinin tətbiqini qadağan edir.

Aşağıdakı hallarda işçi sınaq müddəti olmadan birbaşa işə qəbul edilməlidir:

Yaşı 18-dən az olan şəxslər;

Hamilə və ya 3 yaşına çatmamış uşağı olan qadınlar, habelə 3 yaşınadək uşağını təkbaşına böyüdən kişilər;

Müsabiqə yolu ilə vəzifəyə qəbul edilənlər;

Təhsilini bitirdiyi il ixtisası üzrə ilk dəfə işə düzələnlər;

Ödənişli seçkili vəzifəyə seçilənlər;

İki aya qədər qısa müddətə işə götürülənlər.                                                                                                                                                                               

Sualı cavablandırdı: Babək rayon prokurorunun köməkçisi II dərəcəli hüquqşünas - Nəriman Vəliyev