2025-ci ilin 25 fevral tarixində Naxçıvan Dövlət Texniki Kolleci 100 illik yubileyini qeyd etdi. Bu mühüm hadisə, kollecin keçdiyi şərəfli inkişaf yolunun, onun təhsil sisteminə verdiyi töhfələrin və yetişdirdiyi yüzlərlə ixtisaslı kadrın əhəmiyyətini vurğulayan tarixi bir mərhələdir.

Kollecin əsası 1925-1926-cı tədris ilində “Naxçıvan Kənd Təsərrüfatı Texnikumu” adı ilə qoyulmuşdur. O zaman yalnız 41 tələbə ilə fəaliyyətə başlayan təhsil müəssisəsi zamanla genişlənmiş, müxtəlif ixtisaslar üzrə kadr hazırlığı həyata keçirmişdir. Müasir dövrdə isə bu kollec regionun ən nüfuzlu təhsil ocaqlarından biri kimi tanınır. Kollecin müasir təhsil proqramı, ən son texnologiyalardan istifadə edərək tələbələrin nəzəri biliklərlə yanaşı praktik bacarıqlara da yiyələnməsini təmin edir.

Təhsil aldığım üç il ərzində kollec mənim üçün yalnız bir təhsil ocağı deyil, həm də geniş dünyagörüşü qazandığım, peşəkar bacarıqlarımı inkişaf etdirdiyim bir mühit oldu. Burada müəllimlərin yüksək peşəkarlığı və fədakarlığı sayəsində biz tələbələr təkcə bilik əldə etməklə kifayətlənmədik, həm də real iş həyatına hazırlaşdıq. Müəllimlərimiz müasir təhsil metodlarını tətbiq edərək hər bir tələbənin inkişafını diqqətlə izlədilər, onları peşəkar həyata hazırlamaq üçün var gücləri ilə çalışdılar.

Bu üç il ərzində bir çox əlamətdar hadisələrin şahidi oldum və müxtəlif tədbirlərdə iştirak etdim. İlk təhsil ilimdə Azərbaycan xalqının Ümummilli Lideri Heydər Əliyevin 100 illik yubileyi ilə bağlı keçirilən tədbirlərdə aktiv iştirak etdim. Bu tədbirlər təkcə biliklərimi artırmaqla kifayətlənmədi, həm də kollektiv işdə iştirak etmək, təşkilatçılıq bacarıqlarımı inkişaf etdirmək baxımından mənə böyük təcrübə qazandırdı. Bu dövrdə yazdığım "Ulu Öndərimizin irsi biz gənclər üçün milli-mənəvi dəyərdir" adlı məqalə mənim gələcəkdə daha çox tədbirə qatılmaq və özümü inkişaf etdirmək üçün daha çox çalışmağıma səbəb oldu.

İkinci kursda isə Naxçıvan Muxtar Respublikasının 100 illik yubileyi ilə əlaqədar keçirilən tədbirlərdə iştirak edərək muxtar respublikanın tarixi və mədəni irsi haqqında daha çox məlumat əldə etdim. Bununla yanaşı, şəhidlərin anım günlərinə həsr olunmuş tədbirlərdə, onların doğum günlərinə təşkil edilən mərasimlərdə iştirak etdim. Bu tədbirlər məndə vətənpərvərlik ruhunu daha da gücləndirdi, şəhid ailələri ilə görüşlər isə mənim üçün unudulmaz təəssüratlar buraxdı. Bayram tədbirlərində iştirak edərək milli dəyərlərimizi daha yaxından tanıdım və onlara sahib çıxmağın vacibliyini dərk etdim.
Bu il kollecdəki son təhsil ilimdir və bu təhsil həyatımı zirvədə başa vurmaq üçün fevralın 25-də keçiriləcək kollecin 100 illik yubiley tədbirində daha fəal iştirak etməyə hazırlaşıram. Bu yubiley təkcə kollecin keçmişini qeyd etmək üçün deyil, həm də onun gələcək inkişaf perspektivlərini müzakirə etmək üçün əhəmiyyətli bir hadisədir.

Naxçıvan Dövlət Texniki Kollecində keçirdiyim üç il ərzində iştirak etdiyim tədbirlər mənim üçün unudulmaz həyat dərsləri oldu. Təhsil dövrü yalnız bilik əldə etmək deyil, həm də tarixi və milli dəyərləri öyrənmək, sosial məsuliyyət hissini dərk etmək üçün bir fürsət idi. Kollecin 100 illik yubileyini qeyd edərkən, burada qazandığım bilik və təcrübələrin mənə gələcək həyatımda uğurlar gətirəcəyinə inanıram.

Bu yubiley, kollecin keçmişi ilə gələcəyi arasında bir körpü rolunu oynayaraq, gələcək nəsillərə daha müasir və keyfiyyətli təhsil vermək üçün yeni imkanlar açacaq. Naxçıvan Dövlət Texniki Kollecinin yüzillik tarixi onun nə qədər möhkəm bir təhsil bazasına sahib olduğunu və gələcəkdə də bu uğurların davam edəcəyini sübut edir.

Adəm İbrahimov

Naxçıvan Dövlət Texniki Kollecinin III kurs tələbəsi