Mədəniyyət müəssisələrində bir sıra rəhbər və ümumi vəzifələrə işə qəbul üçün elan olunmuş müsabiqənin müsahibə mərhələsi başlayır.

"NAXÇIVANXƏBƏRLƏRİ" məlumat verir ki, Naxçıvan Muxtar Respublikasının Mədəniyyət Nazirliyinin sistemində fəaliyyət göstərən mədəniyyət müəssisələrində bir sıra rəhbər və ümumi vəzifələrə işə qəbul üçün fevralın 3-də  elan olunmuş müsabiqənin müsahibə mərhələsi başlayır. Müsahibə 4 mart - 13 mart 2026-cı il tarixləri arasında Naxçıvan Muxtar Respublikası Mədəniyyət Nazirliyinin yerləşdiyi inzibati binada keçiriləcək.

Müsabiqə mərhələsində 20  dəqiqə ərzində namizədlərin peşəkarlıq qabiliyyətləri, şəxsi keyfiyyətləri və ümumi dünyagörüşü müsahibə proqramına uyğun olaraq komissiya tərəfindən yoxlanılır. Komissiya müsahibə zamanı namizədləri müvafiq meyarlar əsasında 5 ballıq  sistem əsasında qiymətləndirilir. Namizədlər meyarlar üzrə ortalama 3 bal topladıqda bu mərhələni uğurla keçmiş sayılır.

Müsabiqənin nəticəsi barədə məlumat müsahibənin keçirildiyi gündən 1 iş günü müddətində Nazirliyin rəsmi səhifəsində (nculture.gov.az) paylaşılacaq. Namizədlər imtahana gələrkən şəxsiyyət vəsiqələrini, dövlət nümunəli təhsil sənədinin (diplomun) və ya ali (orta ixtisas) təhsili müəssisəsini bitirmə haqqında sənədi özləri ilə birlikdə gətirməlidirlər.

Müsahibədə iştirak edəcək namizədlər müsahibə qrafiki ilə https://nculture.gov.az/qrafksmuhabe linki vasitəsilə tanış ola bilərlər:

Namizədlər, həmçinin qeyd olunan linkə Nazirliyin saytı və İnstagram səhifəsinin status bölməsindən də daxil ola bilərlər.

Qeyd edək ki, müsabiqəyə sənəd qəbulu 3 fevral 2026-cı il tarixdən 23 fevral 2026-cı il tarixinədək həyata keçirilib.