İyun ayının 25-də Naxçıvan Muxtar Respublikası Penitensiar Xidmətinin, Əmək və Əhalinin Sosial Müdafiəsi Nazirliyinin və Səhiyyə Nazirliyinin birgə təşkilatçılığı ilə “Məhkumların və onların ailə üzvlərinin sosial müdafiəsinin təşkili” mövzusunda tədbir keçirilib.

"NAXÇIVANXƏBƏRLƏRİ" məlumat verir ki, tədbirdə dövlət qurumlarının nümayəndələri, hüquq-mühafizə orqanlarının əməkdaşları və sosial xidmət sahəsində çalışan mütəxəssislər iştirak ediblər. Məqsəd məhkumların və ailələrinin sosial reabilitasiyası, cəmiyyətə inteqrasiyası və hüquqlarının qorunması sahəsində qarşılıqlı əməkdaşlığın gücləndirilməsi olub.

Penitensiar Xidmətin Strateji Planlaşdırma və Monitorinq Şöbəsinin rəisi, ədliyyə polkovnik-leytenantı Əli Rəhimov çıxışında qeyd edib ki, cəzaçəkmə müəssisələrində təkcə məhkumların saxlanılması deyil, onların islah olunaraq cəmiyyətə yararlı vətəndaş kimi qaytarılması istiqamətində də kompleks tədbirlər həyata keçirilir. Onun sözlərinə görə, məhkumların ailələri ilə əlaqələrinin qorunması onların psixoloji durumuna müsbət təsir edir və bu baxımdan dövlət dəstəyi vacibdir.

Əmək və Əhalinin Sosial Müdafiəsi Nazirliyinin Əmək məşğulluq siyasəti şöbəsinin müdiri Vüsal Süleymanlı bildirib ki, məhkumların ailələrinin sosial rifahının yüksəldilməsi əsas prioritetlərdən biridir. O, məşğulluq imkanlarının genişləndirilməsi, sosial proqramlara cəlb olunma və peşə hazırlığı kurslarının bu istiqamətdə mühüm rol oynadığını vurğulayıb.

Səhiyyə Nazirliyinin Tibbi xidmətin təşkili şöbəsinin baş məsləhətçisi Süleyman Cəfərov isə məhkumların və onların ailə üzvlərinin tibbi xidmətlərə çıxış imkanlarının artırılması sahəsində görülən işlər barədə məlumat verib. O qeyd edib ki, həm profilaktik tədbirlər, həm də fərdi tibbi yardım mexanizmləri bu sahədə əhəmiyyətli rol oynayır.

Tədbirin sonunda iştirakçılar arasında qarşılıqlı müzakirələr aparılıb, təkliflər səsləndirilib. Bildirilib ki, bu istiqamətdə tədbirlər davamlı xarakter daşıyacaq və dövlət qurumları arasında əməkdaşlıq daha da genişləndiriləcək.